ಫಿಶಿಂಗಿನ ಹುಚ್ಚು ತೇಜಸ್ವಿಯವರಗೆ ಬಾಲ್ಯದಿಂದಲೂ ಇದೆ.
ತೇಜಸ್ವಿ ಅವರ ಸ್ನೇಹಿತ ರಾಮದಾಸ್ ಅವರ ಜೊತೆ ಮೀನು ಹಿಡಿಯಲು ಹೋಗುತ್ತಿದ್ದರಂತೆ. ಮಿಕ್ಕೆಲ್ಲರೂ ಇವರು ಮೀನು ಹಿಡಿಯಲು ಹೋಗುತ್ತಿದ್ದುದ್ದನ್ನು ಜಿಗುಪ್ಸೆ ಮತ್ತು ತಿರಸ್ಕಾರದಿಂದ ಕಂಡರೆ ಕುವೆಂಪು ಅವರು ಮಾತ್ರ ಮೀನು ಹಿಡಿದುಕೊಂಡು ಬಂದ ನಂತರದ ಕಥೆಯನ್ನೆಲ್ಲಾ ತಾಳ್ಮೆಯಿಂದ ವಿವರವಾಗಿ ಕೇಳುತ್ತಿದ್ದರಂತೆ. ಇನ್ನು ತೇಜಸ್ವಿ ಅವರ ಅನೇಕ ಪುಸ್ತಕಗಳಲ್ಲಿ ಅವರ ಫಿಶಿಂಗ್ ಅನುಭವಗಳ ರಸವತ್ತಾದ ಕಥೆಗಳಿವೆ. ಇವರ ‘ಅಲೆಮಾರಿಯ ಅಂಡಮಾನ್ ‘ ಪುಸ್ತಕದಲ್ಲಿ ಫಿಶಿಂಗಿನ ಚಿತ್ರ ವಿಚಿತ್ರ ಅನುಭವಗಳನ್ನು ದಾಖಲಿಸಿದ್ದಾರೆ ತೇಜಸ್ವಿ.

ಬಹುಶಃ ಇಂಥದ್ದೊಂದು ಘಟನೆ ಯಾವೊಬ್ಬ ಲೇಖಕನ ಜೀವನದಲ್ಲಿ ನಡೆದಿರಲಿಕ್ಕಿಲ್ಲ. ತಾನೇ ಸೃಷ್ಟಿಸಿದ ಪಾತ್ರಗಳು, ಬಂದು ಲೇಖಕನ ಜೊತೆ ಪಾತ್ರದಲ್ಲಿನ ತನ್ನ ವ್ಯಕ್ತಿತ್ವದ ಸಮರ್ಥನೆಯ ಕುರಿತು ಜಗಳವಾಡುವುದು. ಇಂಥದ್ದೊಂದು ಅಪರೂಪದ ಘಟನೆ ನಡೆದಿದ್ದು, ತೇಜಸ್ವಿ ಹಾಗೂ ಬಿರಿಯಾನಿ ಕರಿಯಪ್ಪನ ನಡುವೆ. ತೇಜಸ್ವಿ ಬರೆದ ಕರ್ವಾಲೋ ಕಾದಂಬರಿಯಲ್ಲಿ ಪಾತ್ರವಾಗಿ ಬರುವ ಬಿರಿಯಾನಿ ಕರಿಯಪ್ಪ ಹಾಗೂ ಹಾವು ಗೊಲ್ಲರ ಎಂಕ್ಟ ಇಬ್ಬರು ನಿಜ ಜೀವನದಲ್ಲಿ ತೇಜಸ್ವಿಗೆ ಪರಿಚಿತ ವ್ಯಕ್ತಿಗಳು. ಕಾದಂಬರಿಯಲ್ಲಿ ಇವರ ಪಾತ್ರ ಪೋಷಣೆಯ ಕುರಿತಾಗಿ ಹಾಗೂ ಕೆಲ ಸನ್ನಿವೇಶಗಳನ್ನು ಕುರಿತು ಆಕ್ಷೇಪವೆತ್ತಿ, ತೇಜಸ್ವಿಯನ್ನು ಈ ಬಗ್ಗೆ ಪ್ರಶ್ನಿಸಲು ಅವರನ್ನು ಹುಡುಕಿಕೊಂಡು ಬಂದು ಪ್ರಶ್ನಿಸುತ್ತಾರೆ.

ತೇಜಸ್ವಿ ರಚಿಸಿದ ಪಾತ್ರಗಳು ಮೂಡಿಗೆರೆಗೆ ಮಾತ್ರ ಸೀಮಿತವಾಗಿರದೆ ನಮ್ಮ ನಮ್ಮ ಊರಲ್ಲೇ ಅಂಥ ವ್ಯಕ್ತಿಗಳನ್ನು ಕಾಣುವಂಥ ಮನಸ್ಥಿತಿಯನ್ನು ನಮ್ಮಲ್ಲಿ ಜಾಗೃತಗೊಳಿಸುತ್ತವೆ.

ತೇಜಸ್ವಿ ಸೃಷ್ಟಿಸಿದ ಪಾತ್ರಗಳು ಯಾವ ಮಟ್ಟಿಗೆ ನಮ್ಮನ್ನೆಲ್ಲ ಪ್ರಭಾವಿಸಿದೆಯೆಂದರೆ ವಾಸ್ತವವಾಗಿ ನಾವೆಲ್ಲರೂ ನಮ್ಮನಮ್ಮ ಊರಲ್ಲೇ ಇದ್ದರೂ ಮಾನಸಿಕವಾಗಿ ಮೂಡಿಗೆರೆಯಲ್ಲೇ ಬದುಕುತ್ತಿರುತ್ತೇವೆ. ಯಾರಾದರೂ ಕೊಂಚ ಪೆಂಗು ಪೆಂಗಾಗಿ ಆಡಿದರೆ ಅವರಲ್ಲಿ ಮಂದಣ್ಣನನ್ನು ಕಾಣುತ್ತಾ , ಕಂಡ ಕಂಡ ಪಕ್ಷಿ ಕೀಟಗಳ ಬಗ್ಗೆ ಬೆರಗು ತೋರುತ್ತಾ , ವಿಸ್ಮಯಗಳಿಗೆ ಕಣ್ಣರಳಿಸುತ್ತ ಕುಳಿತಿರುತ್ತೇವೆ. ತೇಜಸ್ವಿಯವರ ಕೃತಿಗಳ ಪಾತ್ರಗಳೆಲ್ಲವೂ ಕೊಂಚ ಅತೀ ಎನಿಸುವಷ್ಟೇ ವಾಸ್ತವದಲ್ಲಿ ಬದುಕುತ್ತಿರುತ್ತವೆ. ಹಾರುವ ಓತಿ ಕೈತಪ್ಪಿದರೂ ಮತ್ತೆ ಸಿಗುತ್ತದೆ ಎಂಬ ಆಶಾವಾದವನ್ನು ಇಟ್ಟುಕೊಂಡಿರುತ್ತವೆ . ಆದರೆ ನಾವು ಹಾಗಲ್ಲ. ‘ಛೇ ಮಿಸ್ಸಾಯ್ತಲ್ಲ ‘ಅಂತ ತಲೆ ಮೇಲೆ ಕೈ ಹೊತ್ತು ಕೂರುತ್ತೇವೆ. ಜುಗಾರಿ ಕ್ರಾಸಿನ ರತ್ನಮೂಲದ ವಿವರವಿರುವ ಕಡತದ ಬಗ್ಗೆ ಕನಸು ಕಾಣುತ್ತೇವೆ. ಪ್ಯಾರನ ಕನ್ನಡ ಮಾತನಾಡುವ ಶೈಲಿ, ಮಾರನ ಅಸಾಧಾರಣ ಬುದ್ಧಿವಂತಿಕೆ , ಕಿವಿಯ ಚುರುಕುತನ ಎಲ್ಲವನ್ನೂ ಚಿತ್ರಿಸಿ, ಅತೀ ಸಾಮಾನ್ಯ ವಿಷಯವನ್ನೂ ಬೆರಗಿನಿಂದ ಗಮನಿಸುವಂತೆ ಮಾಡಿದ್ದು ತೇಜಸ್ವಿ.

ತೇಜಸ್ವಿ ಅವರು ಅನೇಕ ಅದ್ಭುತವಾದ ಪೇಂಟಿಂಗ್’ಗಳನ್ನು ರಚಿಸಿದ್ದಾರೆ. ‘ I started my career as a Painter , ಆದರೆ ಜನ ನನ್ನ ಬರವಣಿಗೆಯನ್ನು ಮೆಚ್ಚಿ ನನ್ನನ್ನು ರೈಟರ್ ಅಂತ ಗುರುತಿಸಿದ್ದರಿಂದ ನಾನು ಬರವಣಿಗೆಯನ್ನೇ ನನ್ನ ಪ್ರಮುಖ ಮಾಧ್ಯಮವಾಗಿ ತೆಗೆದುಕೊಂಡೆ ‘ ಎಂದು ಖುದ್ದು ತೇಜಸ್ವಿ ಅವರೇ ಒಂದು ಸಂದರ್ಶನದಲ್ಲಿ ಹೇಳಿದ್ದಾರೆ. ಮೈಸೂರಿನ ಸುಪ್ರಸಿದ್ಧ ಕಲಾವಿದರಾದ ಎಸ್.ಎನ್.ಸ್ವಾಮಿಯವರ ಬಳಿ ಇವರ ಚಿತ್ರಕಲೆಯ ಅಭ್ಯಾಸ ಶುರುವಾಗಿದ್ದು.

ಅವರ ಚಿತ್ರಕಲೆ ಅಭಿರುಚಿ ನಂತರ ಅವರನ್ನು ಉತ್ತಮ ಡಿಜಿಟಲ್ ಅರ್ಟಿಸ್ಟ್ ಆಗುವಂತೆ ಮಾಡಿತು ಎಂದರೆ ತಪ್ಪಾಗಲಾರದು